Сонголт хийх заримдаа хэцүү байдаг. Юу зөв юу буруу байх нь тухайн цаг үе, сэтгэл санааны байдал, мэдээлэл бүрэн бус байх, орчин болоод нийгмийн үзэл бодол төдийгүй эргэн тойрны хүмүүс гээд олон хүчин зүйл сонголтод нөлөөлөх боломжтой билээ. Ажлаас уйдах мэдрэмж та авч байсан уу? Өдөр бүр нэгэн хэвийн өнгөрөөд, яг нэг байрандаа гацсан юм шиг санагдах үе амьдралд цөөнгүй тохиодог билээ. Чадвартай хэдий ч та өөрт тохирохгүй, тухгүй газраа хэт удаан байх нь тийм ч таатай байдал биш юм.
Юуны түрүүнд хувь хүн өөрийгөө таньж мэднэ гэдэг их чухал. Юунд дуртай, юуг хүсэж мөрөөддөг болоод өөрийн амьдралаас хүлээх хүлээлт, баримталдаг зарчим, үнэ цэн, давуу болон сул талууд гээд сайн мэддэг байх нь хаана байхаа сонгохын үндэс болох юм. Олон хүн өөрийн чадварыг бүрэн ойлгоогүй, эсвэл зах зээл дээр хэрхэн зөв байршуулж байгаагаа мэдэхгүйгээс болж өөрт тохироогүй ажлыг сонгох нь олонтаа.
Бодит байдал дээр олон чадварлаг, потенциал өндөр хүмүүс өөрт тохироогүй ажил дээр удаан хугацаанд гацсан хэвээр байдаг. Зарим нь тогтвортой байдал, цалин, эсвэл айдсаас шалтгаалан тухайн орчноос гарахгүй уддаг. Харин зарим тохиолдолд компани өөрөө тухайн хүний потенциалыг бүрэн ашиглаж чаддаггүй, эсвэл өсөлтийн боломж нь хязгаарлагдмал байдаг байна.
Үр дүнд нь чадвартай хүмүүс хийж чадах зүйлээсээ доогуур түвшинд гацаж, сэтгэл ханамжгүй ажиллах нь элбэг. Өөрийн ур чадвар, сонирхол, үнэ цэнтэйгээ нийцсэн орчинд байх нь илүү сэтгэл ханамжтай, тогтвортой ажиллах үндэс юм.
Өөрийн туршлагаасаа хуваалцахад, ажил дээрээ аль болох асуудлыг зөв бөгөөд хурдан шийдээд, бусадтай зохицох гэж хичээж, заримдаа илүү цагаар ажиллаж гэр бүлдээ болон өөртөө зарцуулах цагаасаа ч ажилдаа зарцуулж удаан хугацаанд ажилласан. Мөн хариуцлагаа хамгийн түрүүнд ухамсарлаж, тухайн зорилгод хүрч, таскаа биелүүлэхийг урьтал болгож ажиллана. Удирдлага нь хэрвээ ажилчдаа анзаардаггүй, ажлын үр дүнг шударга үнэлж чаддаггүй, хэт их шахаж улмаар тэр байдал нь дарамт болдог тохиолдолд ажилчлдын сэтгэл зүй хамгийн түрүүнд гэмтдэг. Бүтэнсайны орой сэтгэлийн түгшүүрийг мэдэрч, ажилдаа өглөө дуртай явах эрч хүч яваандаа суларсаар л байдаг.
Зөв газраа байгаа үед илүү суралцах хүслээр дүүрэн, хамт олондоо сэтгэл хангалуун, work buddy-тай буюу ажлын сайн найзтай, хийж буй зүйлсээсээ урам авч, хааяа ч болов өөрөөрөө бахархан, нээлттэй мэдээлэл солилцоо бүхий орчинд бүтээмж өндөртэй ажиллах нөхцөл бүрдэх байх гэж боддог. Тушаал дэвших, урамшуулал авах, цалин орлогоо нэмэгдүүлэх боломжууд байвал хэн ч байсан илүү урт хугацаанд ажиллахыг эрмэзэнэ гэдэгт эргэлзэхгүй байна. Харин сөрөг буюу хортой уур амьсгалтай газар хүн ачаалал багатай ажилласан ч маш их туйлдаж, идэвхгүй болсон байх магадлалтай.
Заримдаа чадвартай хүмүүс ч гэсэн тогтвортой байдалд дасах үедээ аюулгүй бүсээс гарахаас эмээх нь бий. Тогтмол цалин, танил орчин, дассан хамт олон нь гаднаасаа тайван, найдвартай мэт санагдавч энэ нь илүү том боломж руу дөхөх алхмыг нь саатуулдаг. Ийм үед хүн өөрт илүү тохирох, өсөлт авчрах боломжийг олж харсан ч эрсдэлээс зайлсхийж, одоогийн байдалдаа үлдэхийг сонгодог нь урт хугацаандаа хөгжлөөс нь холдуулдаг байх талтай юм.
Гэхдээ амьдралд гаргах шийдвэрүүд бүгд л биднээс хамааралтай байдаг билээ. Өнөөдрийн сонголт маргаашийн ирээдүйг тодорхойлно гэдэг үг шиг хэрвээ танд өөрчлөлт хиймээр санагдаж байвал эрсдлээс айлгүй оролдоод үзээрэй. Нэг хаалга хаахад нөгөө хаалга нээгддэг учраас чадварыг тань услах зөв газарт хувь нэмрээ оруулаарай. Өөрийгөө дэмждэг, үнэлдэг, санал санаачлагыг сонсдог орчинд байх нь амьдралаас авах аз жаргалыг тань нэмэгдүүлэх ч юм билүү.
