Хурлын тэмдэглэл хөтөлнө гэдэг бас л амаргүй ажил байдаг даа тээ? Дутуу сонсчих вий, буруу ойлгочих вий гээд л. Олон улсад Англи хэл дээр бол бараг онлайн хурал болгон л тэмдэглэл хөтлөгчтэй болж, хурал дууслаа бол тэмдэглэл, тойм нь бэлэн болчихдог. Монгол хэл дээр тийм юм бараг байхгүй. Ингээд манай DuranAI баг өнгөрсөн хэдэн сарын туршид Монгол хэлний яриаг текст болгон хөрвүүлэх чадвартай "ДЭЛДЭН" хэмээх модель дээр ажиллаж дуусаад, үүн дээр суурилж анхны бүтээгдэхүүн болох Дэлдэн - Хурлын Тэмдэглэл Хөтлөгчөө танилцуулж байна.

Google Meet, Teams, Zoom зэрэг онлайн хурал хийдэг хүн бүхэнд хэрэгтэй программ. Хурал дээр хэн юу хэллээ, ямар ямар шийдвэр гаргалаа, дараагийн алхмууд / ажлын жагсаалт юу билээ гэж санаа зовохгүй хурлаа хийхэд л болно. Дэлдэн энэ бүхнийг нь сонсоод, хөрвүүлээд гаргаад өгнө гэсэн үг. Зарим нэг онцлог чадварууд:

• Монголчууд маань Англи үг/өгүүлбэр их хольж ярьдаг. Гадаадын хүмүүстэй ч их уулзалт хийдэг. Дэлдэн codeswitch буюу Монгол, Англи хэл аль алийг нь сонсох чадамжтай.
• Таны тэмдэглэлийг зөвхөн та л харах боломжтой. Та өөрийн сонгосон нууц үгээр бүх хурлын тэмдэглэлээ шифрлэх боломжтой. Тэгснээр манай системд хадгалагдахдаа ч хүртэл шифрлэгдсэн байна. Зөвхөн та систем дотроо нууц үгээ хийсэн тохиолдолд л танд харагдана.
• Мэйлээр хурлын тэмдэглэлээ хүлээн авах боломж. Мөн PDF ээр татан авах боломжтой.
• Microsoft Teams, Google Meet, Zoom дэмжинэ. Google Calendar, Microsoft Outlook аль аль календарьтай холбох боломжтой.
• Календарь дээр байгаа видео линктэй хурлууд шууд дэлдэн рүү автоматаар орж ирэх бөгөөд, яаралтай шуурхай хурал хийх хэрэгтэй бол хурлын линкээ оруулахад л дэлдэн гүйгээд орно.